एजेन्सी, फागुन ३ । आईसीसी टी-२० विश्वकप अन्तर्गत समूह ‘सी’ बाट वेस्ट इन्डिज क्रिकेट टोली सुपर एटमा प्रवेश गरेको छ। भर्खरै सम्पन्न खेलमा नेपाल राष्ट्रिय क्रिकेट टोली लाई ९ विकेटले पराजित गर्दै वेस्ट इन्डिजले लगातार तेस्रो जित निकाल्यो र एक खेल बाँकी रहँदै प्लेअफ यात्रा पक्का गर्यो। लगातार तीन हारपछि नेपाल भने प्रतियोगिताबाट बाहिरिएको छ।
वानखेडे स्टेडियम मा भएको खेलमा नेपालले दिएको १३४ रनको लक्ष्य वेस्ट इन्डिजले १५।२ ओभरमा १ विकेट गुमाएर पूरा गर्यो। कप्तान शाइ होप ४४ बलमा ६१ रन बनाउँदै अविजित रहे। शिम्रोन हेटमायर ४६ रनमा नटआउट रहँदा ब्रान्डन किङ ले २२ रनको योगदान दिए। नेपालका लागि एक मात्र विकेट नन्दन यादव ले लिए।
दीपेन्द्रको अर्धशतक
टस हारेर पहिले ब्याटिङ गरेको नेपालले २० ओभरमा ८ विकेट गुमाएर १३३ रन बनाएको थियो। उपकप्तान दीपेन्द्रसिंह ऐरी ले ४७ बलमा ५८ रन बनाउँदै टोलीलाई लड्न योग्य स्कोरसम्म पुर्याए। उनी टी–२० विश्वकपमा अर्धशतक बनाउने नेपालका दोस्रो खेलाडी हुन्। यसअघि सुबास खकुरेल ले आईसीसी टी(२० विश्वकप मा अर्धशतक बनाएका थिए।
सोमपाल कामी २६ रनमा अविजित रहे। अन्य ब्याटरले भने ठूलो योगदान दिन सकेनन्।
बलिङतर्फ वेस्ट इन्डिजका जेसन होल्डर ले चार विकेट लिए भने अकिल होसेन, म्याथ्यु फोर्डे, शमार जोसेफ र रोस्टन चेस ले एक–एक विकेट लिए।
अब नेपालले आफ्नो अन्तिम खेल प्रतिष्ठाका लागि खेल्नेछ भने वेस्ट इन्डिज सुपर एटको तयारीमा जुट्नेछ।
प्रकाशित मिति: २०८२ फाल्गुन ३, आईतवार १४:२८
